„Það er svekkjandi að tapa og detta út. Við ætluðum að komast í 8 liða úrslitin í dag og mér fannst frammistaðan hjá okkur vera góð. Klaufaleg mörk sem við fáum á okkur. Í fyrsta markinu er boltanum sparkað af markmanni yfir allan pakkann hjá okkur og í kjölfarið verður samskiptaleysi í öftustu línu og Ingimar nær að pikka honum í netið. Annað markið er líka frekar tilviljanakennt. Ég er ánægður með frammistöðuna fyrir utan þessi mörk. Við vorum betri í fyrri hálfleik en þetta jafnaðist út í þeim seinni og hefði getað dottið báðum meginn." Segir Úlfur Arnar Jökulsson, þjálfari Fjölnis, eftir 2-0 tap gegn Þórsurum í bikarnum
Lestu um leikinn: Fjölnir 0 - 2 Þór
„Við áttum að fara inn í hálfleikinn með forystu, mér fannst við töluvert betri aðilinn í fyrri hálfleik en svo jafnast þetta út í seinni hálfleik. Heilt yfir var þetta jafn leikur og erfitt að segja hvort þetta sé sanngjarnt eða ekki."
Fjölnir náði ágætis köflum í leiknum en þó án þess að skapa sér neinn urmull af afgerandi marktækifærum.
Við vorum að skapa okkur fullt af stöðum en náðum ekki að gera færi úr því. í fyrri hálfleik fengum við samt færi til að skora og við erum svekktir með 0-0 í hálfleik. Frammistaðan var góð og gott að fá mínútur í menn sem hafa verið frá vegna meiðsla."
Fjölnir er nú úr leik í bikarnum og ljóst er að það verður ekkert bikarævintýri í Grafarvogi á þessu ári.
„Við höfum tvisvar komist í bikarúrslit (2007 og 2008). Við ætluðum að tryggja okkur annan bikarleik í dag, það hefði verið gaman að fara áfram og geta farið í undanúrslit með einum sigri í viðbót. Það getur allt gerst í þessu en við erum bara dottnir út."
Fjölnismenn hafa unnið fyrstu tvo leiki sína í Lengjudeildinni og næst á dagskrá er útileikur gegn Dalvík.
„Það er 100% stefnan að vinna þar. Það er stutt á milli leikja hjá okkur núna. Við ætlum að sækja þriðja sigurinn í röð á Dalvík og halda áfram okkar góða gengi"
