Fótboltafréttamaðurinn Fabrizio Romano greinir frá því að brasilíski kantmaðurinn Sávio muni ganga til liðs við Manchester City í vikunni.
Sávio er 20 ára gamall og gerði frábæra hluti hjá Girona á síðustu leiktíð, en hann lék þar á láni frá franska félaginu Troyes.
Bæði Girona og Troyes eru í eigu City Football Group, sem gera þau að systurfélögum Man City.
Sávio kom að 21 marki í 41 leik með Girona á síðustu leiktíð og stóð sig nógu vel til að vera valinn í brasilíska landsliðshópinn fyrir Copa América.
Ungstirnið fékk þó ekki mikinn spiltíma í Copa América en skoraði í eina byrjunarliðsleiknum sínum á mótinu, 4-1 sigri gegn Paragvæ.
Athugasemdir
