Fótbolti.net spáir því að þrjár breytingar verði á liði Víkings. Davíð Örn Atlason glímir við meiðsli og verður frá næstu vikurnar. Logi Tómasson verður einnig líklega fjarri góðu gamni þar sem hann fór af velli vegna höfuðhöggs. Þá er líklegt að Birnir Snær Ingason komi inn í liðið þar sem kantmennirnir hafa spilað mikið að undanförnu.

Sjá einnig:
Meiðslalistinn lengdist á mánudag - „Núna reynir á leikmannahópinn"


Hjá KR eru þeir Aron Kristófer Lárusson og Theodór Elmar Bjarnason að snúa til baka eftir leikbann. Líklegt þykir að þeir komi inn í byrjunarliðið í kvöld fyrir þá Þorstein Má Ragnarsson og Stefán Árna Geirsson. Í síðasta leik var KR einungis með fjóra meistaraflokksleikmenn til taks á bekknum.

„Við vorum bara með Kjartan Henry, Kristján Flóka og Stefan Ljubicic á bekknum í dag, plús þrjá stráka sem hafa nánast ekkert æft með okkur, verið í 2. flokk og 3. flokk. Við erum dálítið fáliðaðir, það er erfitt að gera breytingar og hreyfa liðið. En við fáum tvo nýja leikmenn úr leikbanni eftir þennan leik. Þeir verða væntanlega klárir í næsta leik í bikar. Svo eru menn að skríða saman úr meiðslum, Finnur Tómas og Kristinn Jónsson eru að skríða saman. Flóki er að fá mínútur, Stefán Árni nær að spila slatta í dag. Við erum allir að braggast en við þurfum að ná góðri endurheimt fyrir leikinn á fimmtudag því hann verður erfiður," sagði Rúnar Kristinsson, þjálfari KR, eftir leikinn gegn Keflavík á mánudag.

Pálmi Rafn Pálmason var ekki í leikmannahópi KR gegn Keflavík og spáir Fótbolti.net því að Aron Þórður Albertsson muni áfram leysa stöðu djúps miðjumanns.