Ísland fór með sigur af hólmi gegn Litháen í undanúrslitunum fyrr í þessari viku. Það var ekki besti leikur íslenska liðsins en sigur vannst í vítaspyrnukeppni.

Á morgun er svo úrslitaleikurinn þar sem Ísland getur unnið Eystrasaltsbikarinn í fyrsta sinn.

Eystrasaltsbikarinn, eða Baltic Cup, var fyrst haldið árið 1928 en Ísland er í fyrsta sinn að taka þátt í ár. Lettland, mótherjar Íslands, hafa oftast unnið keppnina eða 13 sinnum.

„Við viljum lyfta Baltic Cup, það er klárt mál," sagði Jóhann Berg Guðmundsson, leikmaður íslenska landsliðsins, í viðtali við KSÍ TV á dögunum en hér fyrir neðan má sjá hvernig bikarinn á þessu móti lítur út. Íslenska liðið gæti lyft þessum bikar á morgun.