Leikurinn var gríðarlega fjörugur þar sem mikið var um færi og var Nik ósáttur með varnarleik Þróttar.

„Þetta var skemmtilegur leikur fyrir áhorfendur en varnarleikur okkar var barnalegur á köflum. Við gerðum vel að koma til baka í fyrri hálfleik en svo gerist þetta aftur, það er ekki hægt að lenda tvisvar sinnum tveimur mörkum undir í sama leiknum," sagði Nik.

„Stelpurnar eiga hrós skilið fyrir að halda áfram að berjast til enda. Við fengum færi en þessar fyrstu 10-15 mínútur af síðari hálfleik breyttu öllu."

Nik var ekki sáttur með dómgæsluna í leiknum rétt eins og stuðningsmenn Þróttar. Það var sérstaklega athugavert þriðja mark Selfoss en Nik segist ekki hafa séð það.

„Mér fannst mikið ósamræmi í dómgæslunni og þetta kjaftæði gerist í hverri viku. Það er svolítið ógeðslegt að það sé farið svona með okkur. Við brjótum af okkur einu sinni eða tvisvar og fáum gult spjald. Andstæðingarnir brjóta af sér sex, sjö, átta sinnum og fá bara smá tiltal. Það fer eftir hvaða leikmaður það er.

„Ég er bara að biðja um samræmi í dómgæslunni. Ekkert annað."

Þróttur er með þrjú stig úr fjórum leikjum og er Nik ánægður með frammistöðu liðsins hingað til á tímabilinu.