Sindri Kristinn Ólafsson markvörður FH

Mynd: Fótbolti.net - Hafliði Breiðfjörð

„Maður er sáttur við að sækja stigið úr því sem komið var. Vorum 1-0 undir á nítugustu og eitthvað mínútu og þeir fá svo víti þannig jú jú við tökum alveg punktinum en mér fannst við vera heilt yfir betri aðilinn." Sagði Sindri Kristinn Ólafsson markvörður FH eftir leikinn í dag.

Valur fékk vítaspyrnu stuttu eftir jöfnunarmark FH og steig Gylfi Þór Sigurðsson á punktinn fyrir Val. Sindri Kristinn gerði þó frábærlega að verja frá honum vítaspyrnuna og tryggja um leið FH stig í dag.

„Við Stjáni vorum búnir að fara yfir þetta fyrir og ég sagði einmitt við Gylfa eftir leik að við vorum búnir að veðja á vinkilinn að hann myndi setja hann. Hann setur hann yfirleitt í vinkilinn þannig ég ætlaði að láta mig flakka þar en ég veit ekki hvort hann hafi sett hann svona fyrir miðju en ég náði að dúndra honum í burtu með löppunum. Ég ætla ekki að segja það að ég hafi vitað það að Gylfi ætlaði að setja hann í miðjuna en alltaf gaman að verja víti." 

Sindri Kristinn var að verja mark FH í fyrsta sinn í smá tíma en hann hefur þurft að verma varamannabekkinn í úrslitakeppninni til þessa. 

„Mér leið vel inni á vellinum. Eftir svona fyrstu tvær, þrjár mínúturnar eða fyrstu tvö mómentin þá leið mér bara vel allan tímann." 

„Þó þetta voru ekki nema fjórir leikir þá voru þetta samt alveg fjórir leikir sem maður er ekki búin að vera í markinu og maður þarf svolítið að fá fyrsta skotið, grípa fyrsta krossinn svona til að komast í takt við liðið og ég er mjög ánægður með að fá tækifærið í dag." 

Sindri Kristinn hefur mátt þola ágætis gagnrýni í sumar.

„Gagnrýni á alltaf rétt á sér. Ég hef alveg sagt það að mér fannst kannski frammistaðan ekki það hræðileg eins og það er kannski verið að tala um, auðvitað eru þetta einhver móment. Þjálfarateymið ræður þessu og ég var mjög ánægður að fá tækifærið í dag og tel mig hafa gripið það."

Nánar er rætt við Sindra Kristinn Ólafsson markmann FH í spilaranum hér fyrir ofan.