„Þetta var gaman! Leiðinlegt að vera að fara, en geggjað að enda þetta á þessum nótum,'' sagði Sveinn Margeir Hauksson, markaskorari KA, eftir 1-0 sigur á Víking R. í Bestu-deild karla í dag. Sveinn heldur nú til Bandaríkjanna í nám og spilar ekki meira með KA á þessu tímabili.
Lestu um leikinn: KA 1 - 0 Víkingur R.
„Þetta er aðeins að koma núna hjá okkur. Ég veit ekki alveg hvað var í gangi í byrjun, það er skrítið að segja það en mér fannst það vera smá óheppni. Núna finnst mér við vera komnir á réttan veg og loksins farnir að sýna eitthvað.''
Það var ótrúlegt að ekki skyldi vera komið mark í leikinn áður en Sveinn loksins braut ísinn á 88. mínútu. Bæði lið höfðu fengið frábær tækifæri til að skora en allt kom fyrir ekki.
„Þeir voru miklu meira með boltann. Svo fáum við nokkur skipti til að refsa þeim. Harley kom sér í gott færi, Viðar var rangstæður í fyrri, svo var Harley aftur á ferðinni. Þeir fengu líka fullt af færum, settu þarna í skeytin út í byrjun. Þá leið manni ekkert frábærlega! Fínt að enda þetta svona,'' sagði glaðbeittur Sveinn.
Er ekkert erfitt að fara á þessum tímapunkti?
„Jú það er mjög erfitt, en þetta er bara svona. Maður reynir að fá að vera eins lengi og maður getur á Íslandi, en það eru allskonar reglur sem að maður þarf að fylgja,'' sagði Sveinn Margeir.
Viðtalið má sjá í heild sinni í spilaranum hér að ofan.
