Bestur í 17. umferð - Er að fullorðnast sem leikmaður og hélt listasýningu

„Patrick Pedersen og Aron Bjarnason voru með listasýningu og Valsliðið í heild," sagði Ingólfur Sigurðsson í Innkastinu eftir magnaðan 5-1 útisigur toppliðs Vals gegn Stjörnunni í gær.

„Aron var frábær með Breiðabliki áður en hann fór út en hann hefur átt það til að eiga nokkra slaka leiki áður en hann skýst upp og er geggjaður nokkra leiki í röð. Það hefur vantað stöðugleika en hvernig hann hefur unnið á og verið gjörsamlega geggjaður hægra megin í Valsliðinu hefur verið gaman að sjá. Það er augljóst að hann er að fullorðnast sem leikmaður og er orðinn miklu stabílli."

Aron Bjarnason var valinn maður leiksins og er leikmaður umferðarinnar. Anton Freyr Jónsson skrifaði um leikinn fyrir Fótbolta.net og sagði þetta um Aron:

„Var frábær í kvöld og var sífellt ógnandi með hraða sínum út á vængnum hjá Valsmönnum. Byrjaði á að físka vítaspyrnu og skoraði síðan sjálfur tvö góð mörk og lagði upp fimmta markið á Birki Má Sævarsson. Frammistaða upp á tíu hjá Aroni í kvöld," skrifaði Anton.