Sádi-Arabía vann sögulegan sigur á Argentínu í fyrstu umferð heimsmeistaramótsins í Katar. Liðin mættust í morgun og tók Argentína forystuna snemma leiks með marki frá Lionel Messi.
Sádar sneru stöðunni við í upphafi síðari hálfleiks og þeim tókst að halda forystunni til leiksloka og uppskáru þannig 2-1 sigur.
Þeir hefðu þó ekki unnið leikinn ef ekki fyrir flottan varnarleik Abdulelah Al Amri sem bjargaði á marklínu í uppbótartíma.
Al Amri kom inn af bekknum á 89. mínútu og bjargaði skoti Julian Alvarez aðeins þremur mínútum síðar með hausnum á sér.
Landsliðsmenn Sáda eru hetjur eftir þennan sigur og þeir geta tryggt sig í 16-liða úrslit með sigri gegn Póllandi í næstu umferð. Það yrði í annað sinn í sögunni sem Sádar fara upp úr riðli á HM.
Athugasemdir
