Anthony Gordon
Anthony Gordon, leikmaður Newcastle United, hefur dregið sig úr enska landsliðshópnum vegna meiðsla en þetta kemur fram í tilkynningu frá enska fótboltasambandinu.
Gordon meiddist á mjöðm í 2-0 sigri Englands á Albaníu í undankeppni HM á föstudag.
Thomas Tuchel, þjálfari enska landsliðsins, segir meiðslin vera áhyggjuefni.
„Hann lítur út fyrir að vera meiddur. Fyrst hélt ég að þetta væri eitthvað með magann á honum, en þetta er mjöðmin og lítur alls ekki vel út. Þetta er svolítið áhyggjuefni,“ sagði Tuchel.
Mikilvægur kafli er fram undan hjá Newcastle United en liðið er í baráttu um að komast í Meistaradeild Evrópu á næstu leiktíð og yrði því mikil blóðtaka fyrir liðið að missa hann í næstu leikjum.
Gordon hefur komið að ellefu mörkum í ensku úrvalsdeildinni á þessu tímabili en Newcastle er í 6. sæti með 47 stig, tveimur stigum frá Meistaradeildarsæti þegar liðið á tíu leiki eftir.
Athugasemdir
