„Mér fannst allt annað lið koma út í seinni hálfleikinn og heilt yfir bara pínu svekktur að hafa ekki náð að klára þetta“ sagði Davíð Smári Lamude, þjálfari Vestra, eftir 2-2 jafntefli gegn KR í 8. umferð Bestu deildar karla í dag.
Lestu um leikinn: KR 2 - 2 Vestri
KR var með þægilega 2-0 forystu um miðbik seinni hálfleiks. Síðan skoraði Tufegdzic úr vítaspyrnu og nokkrum mínútum síðar var Pétur Bjarnason búinn að jafna metin fyrir Vestra.
„Að skora mark hjálpar alltaf og við áttum bara verðskuldað víti. Klaufalegt brot hjá markmanni KR en eins og ég segi þá breyta mörk leikjum og það gerði það í dag.“
Davíð Smári talaði einnig um þau miklu ferðalög sem liðið hefur þurft að fara í samanborið við önnur lið í deildinni.
„Við erum búnir að ferðast einhverja 30 þúsund kílómetra síðan í janúar og það er ekki auðvelt. Ég held að það sjái það allir að það er ekki auðvelt fyrir liðið okkar.“
„Að geta komið hérna í seinni hálfleik á móti liðinu sem allir eru að tala um að sé í sínu besta standi og ná að sprengja þá soldið hérna í seinni hálfleik. Ég held að það sýni bara ofboðslega mikinn vilja og kraft og þor. Þannig ég er bara gríðarlega sáttur með það.“
Viðtalið má sjá í heild sinni í spilaranum hér að ofan en beðist er afsökunar á vindhljóðunum sem heyrast við og við í myndbandinu.
