Argentínumaðurinn Alejandro Garnacho skoraði sitt fyrsta mark fyrir Chelsea á 4. mínútu eftir skyndisókn. Pedro Neto fann Garnacho vinstra megin. Hann tók nokkrar gabbhreyfingar áður en hann skaut föstum bolta undir Robin Roefs í markinu.

Wilson Isidor, framherji Sunderland, jafnaði metin fyrir gestina átján mínútum síðar.

Markið kom eftir langt innkast. Boltinn datt í kjölfarið út á Isidor sem skoraði með skoti sem hafði viðkomu af varnarmanni og í netið.

Nýliðarnir héldu Chelsea-mönnum í skefjum og fengu síðan gulrót fyrir það undir lokin er langur bolti kom fram völlinn á Brian Brobbey. Hann slapp inn í teig, en ákvað að halda boltanum aðeins áður en hann gaf hann út á Chemsdine Talbi sem smellti boltanum með innanfótarskoti í hægra hornið.

Glæstur sigur hjá Sunderland sem er komið upp í 2. sæti deildarinnar með 17 stig en Chelsea í 7. sæti með 14 stig. Svakaleg byrjun hjá nýliðunum sem hafa aðeins tapað tveimur leikjum í deildinni.

Newcastle United lagði þá Fulham 2-1 á St. James' Park en það var einnig dramatík í þeim leik.

Jacob Murphy kom Newcastle yfir á 18. mínútu er hann vann boltann af Calvin Bassey, hljóp upp að vítateignum og lagði hann skemmtilega í stöng og inn.

Sasa Lukic jafnaði metin á 56. mínútu. Kevin kom með fyrirgjöfina frá vinstri inn á teiginn á Raul Jimenez sem skaut boltanum í þverslá og niður á línu, en Lukic var mættur til að koma boltanum yfir línuna.

Á lokamínútum leiksins tapaði Bassey boltanum í annað sinn á hættulegu svæði og keyrðu Newcastle-menn upp. William Osula átti skot sem Bernd Leno varði út á Guimaraes og var hann í engum vandræðum með að skila boltanum í netið.

Newcastle aftur á sigurbraut og er nú með 12 stig í 11. sæti en Fulham í 16. sæti með aðeins 8 stig.

Newcastle 2 - 1 Fulham
1-0 Jacob Murphy ('18 )
1-1 Sasa Lukic ('56 )
2-1 Bruno Guimaraes ('90 )

Chelsea 1 - 2 Sunderland
1-0 Alejandro Garnacho ('4 )
1-1 Wilson Isidor ('22 )
1-2 Chemsdine Talbi ('90 )