Mjólkurbikarinn: Kórdrengir lögðu Mosfellinga í framlengingu

Kórdrengir eru komnir í 8-liða úrslit Mjólkurbikarsins eftir dramatískt sigurmark seint í framlengingu gegn Aftureldingu.

Það virtist aðeins eitt lið vera á vellinum í fyrri hálfleik þar sem Mosfellingar stjórnuðu gangi mála en Óskar Sigþórsson stóð sig eins og hetja á milli stanga Kórdrengja. Þökk sé honum var staðan markalaus í hálfleik eftir nokkrar stórkostlegar vörslur.

Síðari hálfleikurinn byrjaði á glæsilegu marki utan af kanti. Þar spretti Þórir Rafn Þórisson upp hægri kantinn og virtist ætla að gefa fyrirgjöf en boltinn flaug þess í stað í samskeytin og inn í markið.

Kórdrengir komust nálægt því að tvöfalda forystuna í tvígang áður en Elmar Kári Enesson Cogic gerði jöfnunarmark fyrir Mosfellinga, á 85. mínútu leiksins.

Það var því gripið til framlengingar og var allt í járnum þar til undir lokin þegar Kórdrengir unnu boltann hátt uppi á vellinum og Sverrir Páll Hjaltested gerði sigurmark á 116. mínútu. 

Nú er aðeins einn leikur eftir í 16-liða úrslitum Mjólkurbikarsins áður en dregið verður í 8-liða úrslitin.