Rio Ngumoah.
Táningurinn Rio Ngumoha gerði sigurmarkið þegar Liverpool vann dramatískan 3-2 sigur á Newcastle á dögunum. Ngumoha, sem er að verða 17 ára, kom inn á í uppbótartímanum og gerði sigurmarkið á síðustu andartökum leiksins.
Ngumoha kom til Liverpool úr akademíu Chelsea í fyrra. Hann spilaði einn leik með aðalliði Liverpool á síðustu leiktíð en verður í stærra hlutverki á þessu tímabili.
Þetta voru umdeild skipti þegar þau gerðust í fyrra. Forráðamenn Chelsea voru brjálaðir með að missa Ngumoha yfir til Liverpool.
Samkvæmt Daily Mail er Chelsea enn í stríði við Liverpool út af þessum skiptum og er að biðja um alvöru uppeldisbætur fyrir hann. Enn á eftir að ákveða hvað Chelsea fær greitt fyrir Ngumoha en hann hafði ekki skrifað undir atvinnumannasamning við Lundúnafélagið.
Chelsea telur byrjun hans á tímabilinu með Liverpool styrkja mál sitt enn frekar varðandi háar uppeldisbætur.
Reiðin hjá Chelsea er mikil en félagið bannaði njósnurum frá Liverpool að mæta á unglingaleiki hjá sér eftir skiptin.
Chelsea reyndi að sannfæra Ngumoha um að skrifa undir samning við félagið en hann var ekki sannfærður um leið sína í aðalliðið hjá félaginu. Liverpool náði að selja honum verkefnið sitt og ákvað hann að fara þangað.
Athugasemdir
