Undankeppni HM: Ísland öruggt með umspilssæti eftir sigur Hollands

Hollenska kvennalandsliðið er komið á topp undanriðilsins fyrir HM eftir þægilegan sigur á heimavelli gegn Hvíta-Rússlandi í dag.

Jill Roord, Aniek Nouwen og Lineth Beerensteyn sáu um markaskorun Hollendinga sem eru með 17 stig eftir 7 umferðir, aðeins ein umferð eftir þar sem framundan er úrslitaleikur gegn Íslandi.

Stelpurnar okkar eiga eftir að spila tvo leiki í undanriðlinum og eru þeir á dagskrá í byrjun september. Þær taka fyrst á móti Hvítrússum og þurfa sigur þar til að endurheimta toppsætið fyrir úrslitaleikinn. Hvítrússar eiga ekki lengur möguleika á því að ná íslenska liðinu og því er Ísland öruggt með umsspilssæti.

Sigur gegn Hvítrússum kæmi Íslandi aftur á toppinn, einu stigi yfir hollenska landsliðið, og þá væru Stelpurnar í betri stöðu en ella fyrir úrslitaleikinn.

Ísland er þó öruggt með umspilssæti eftir úrslit kvöldsins, sama hvernig síðustu tveir leikirnir enda.