Hver tekur við af Klopp? - Dani Olmo orðaður við Man Utd - Greenwood í skiptum fyrir Gleison Bremer
banner
   þri 02. mars 2010 13:43
Hafliði Breiðfjörð
Bjarni Gunnarsson fer til Liverpool í apríl
Bjarni Gunnarsson hefur vakið athygli stórliða í Evrópu og mun fara á reynslu hjá Liverpool í næsta mánuði.
Bjarni Gunnarsson hefur vakið athygli stórliða í Evrópu og mun fara á reynslu hjá Liverpool í næsta mánuði.
Mynd: Fótbolti.net - Hafliði Breiðfjörð
Bjarni Gunnarsson framherji Fjölnis mun fara til enska úrvalsdeildarfélagsins Liverpool á reynslu 12. apríl næstkomandi og æfir með liðinu í fimm daga. Þetta staðfesti Einar Hermannsson formaður meistaraflokksráðs Fjölnis við Fótbolta.net í dag.

Bjarni hefur enn ekki leikið með Fjölni í Íslandsmótinu en hefur átt fast sæti í byrjunarliði liðsins í Lengjubikarnum og æfingamótum það sem af er árinu.

Þrátt fyrir það hefur Bjarni vakið mikla athygli erlendra félaga en í janúar síðastliðnum hafnaði Fjölnir kauptilboði frá Glasgow Rangers í hann.

Hann hefur æft með Tottenham og West Ham á Englandi, Rangers í Skotlandi og Viking í Noregi og nú mun Liverpool bætast á þann lista.

Bjarni Gunnarsson varð 17 ára gamall í lok janúar. Hann hefur spilað sjö leiki með U17 ára landsliði Íslands og skorað í þeim fimm mörk. Frammistaða hans í þeim leikjum vakti athygli þessara stóru liða í Evrópu. Hann er í úrtaki fyrir U19 ára landsliðið.

Fyrir hjá Liverpool eru tveir Íslendingar. Guðlaugur Victor Pálsson sem einnig er uppalinn hjá Fjölni en hafði einnig leikið með Fylki hér á landi, og FH-ingurinn Kristján Gauti Emilsson.
banner
banner
banner
banner