„Við höfum harma að hefna gegn Þór og það er gott að fá þennan leik svona strax eftir þann leik. Okkur fannst sem við ættum meira skilið úr honum," segir Heimir Hallgrímsson, þjálfari ÍBV.
ÍBV mætir Þór á Akureyri í undanúrslitum Valitor-bikarsins en dregið var í hádeginu í dag. Eyjamenn töpuðu þegar þessi lið mættust í deildinni á dögunum.
Það er stíf dagskrá hjá Eyjaliðinu um þessar mundir en liðið heldur á morgun til Írlands þar sem það mætir írska liðinu Saint Patrick's í seinni viðureign liðanna.
„Það er mikilvægt að missa ekki einbeitinguna á það sem er framundan," segir Heimir en ÍBV vann Fjölni í bikarnum í gær með marki nokkrum mínútum fyrir lok venjulegs leiktíma. „Það var mjög gott að hafa sloppið við að fara í framlengingu."
Heimir býst við erfiðum leik á Írlandi. „Það verður mikil pressa á okkur þarna. Þetta verður erfiður leikur, bardagaleikur."
Í sjónvarpinu hér að ofan má sjá viðtalið við Heimi í heild sinni en það var tekið á æfingu ÍBV á Valbjarnarvelli áðan.
