Þórður Þórðarson þjálfari ÍA var að vonum hæstánægður með 6-0 burst sinna manna gegn Þrótti á Valbjarnarvelli er liðin mættust í 1. deild karla í kvöld.
„Við vorum bara frábærir í 90 mínútur. Ég held að þetta sé bara einn besti leikur okkar í sumar og Þróttararnir áttu hreinlega bara ekki séns, það er svo einfalt,“ sagði Þórður við Fótbolta.net eftir leikinn.
Mikill munur var á spilamennsku liðsins í kvöld og þegar þeir rétt mörðu HK í síðustu umferð á Akranesi.
„Munurinn er bara sá að við lékum sem liðsheild í dag og létum boltann ganga hratt á milli manna. Við fórum aðeins yfir þetta eftir síðasta leik og það var að virka vel í dag. Mér fannst við byrja leikinn alveg frábærlega, mikill vilji og þetta minnti mig á þegar við spiluðum illa gegn Víkingi Ólafsvík í fyrri umferðinni og stútuðum leiknum á eftir,“ sagði Þórður.
Viðtalið við Þórð má sjá í heild sinni hér að ofan.
