Árni Freyr í baráttunni í leiknum í kvöld.
Árni Freyr Guðnason fyrirliði ÍR var allt annað en sáttur með spilamennsku sinna manna gegn Haukum í 1. deildinni í kvöld, en hans menn töpuðu 3-2 í Hafnarfirðinum.
„Við vorum rosalega lélegir í fyrri hálfleik og líka í seinni hálfleik. Við náðum bara ekki okkar spili og við erum ekkert sérstakir þegar við erum að dúndra honum fram. Það kom okkur mjög á óvart að við vorum ennþá inni í leiknum í hálfleik og við áttum alveg séns á að gera eitthvað í seinni hálfleik, og við jöfnum aftur, en það lá alltaf í loftinu að þeir myndu skora,“ sagði Árni við Fótbolta.net eftir leikinn.
Árni Freyr er á því að sigur Hauka hafi klárlega verið sanngjarn og jafnvel mátt vera stærri.
„Þetta var algjörlega sanngjarnt. Þetta var frekar of lítill sigur hjá þeim ef eitthvað var. Ég held bara að við höfum ekki verið að berjast og vinna þessa grunnvinnu. Við erum kannski farnir að halda að við séum betri en við erum og við vorum ekki að leggja okkur fram, við vorum bara baráttulausir og einbeitningin ekki til staðar.“
Viðtalið má sjá í heild sinni hér að ofan.
