Fram og Fylkir gerðu annað markalaust sitt í sumar þegar liðin mættust í Laugardalnum í kvöld en leikur þeirra í fyrri umferð Pepsi-deildarinnar endaði einnig 0-0. "Fyrirfram má alveg segja að maður sætti sig við eitt stig á útivelli en engu að síður, miðað við hvernig leikurinn spilaðist, fannst mér við eiga að taka öll stigin í kvöld." sagði Ólafur Þórðarson, þjálfari Fylkis, eftir leikinn.
Gylfi Einarsson kom að nýju inn í lið Fylkis eftir meiðsli og við það breyttist leikur Fylkis umtalsvert. Það vantaði þó töluvert upp á að sóknarleikur Fylkis væri nógu öflugur og skapandi: "Já, ég er sammála því. Það vantaði bara aðeins upp á gæðin hjá okkur að geta skapað okkur fleiri færi."
Andrés Már Jóhannesson var á dögunum seldur frá Fylki og til Haugesund. Fylkismenn virtust sakna hans töluvert í leiknum í kvöld og virtust stundum ráðvilltir með boltann á vallarhelmingi Framara: "Auðvitað söknum við Adda, það er engin spurning. Hann var klárlega einn af okkar bestu mönnum svo hurfu ákveðin gæði með honum. Engu að síður erum við með fullt af efnilegum strákum og þeir verða að halda fókus á að bæta sig og þá kemur þetta hægt og rólega." sagði Ólafur.
Nánar er rætt við Ólaf í sjónvarpinu hér að ofan
