Anna Björk Kristjánsdóttir var að vonum hæstánægð með 5-0 sigur Stjörnunnar gegn Breiðablik í Pepsi deild kvenna. Eftir sigurinn hömpuðu Stjörnustúlkur Íslandsmeistarabikarnum og Anna Björk viðurkennir að það hafi verið gaman.
„Þetta er ekki leiðinlegt, maður þarf að gera þetta sem oftast. Við erum búin að bíða eftir þessu í smá stund og nú kom þetta loksins, það er æðislegt. Við ákváðum að koma ekkert að hálfum hug í þetta og gera þetta af alvöru. Við gerðum það svo sannarlega í dag,“ sagði Anna Björk við Fótbolta.net.
„Það var svolítið hvetjandi þegar við sáum að það var verið að setja upp sviðið í miðjum leik. Það ýtti okkur áfram og hvatti okkur og við ákváðum að sýna allt. Þetta var bara gaman. Við vorum bara að sýna að við getum þetta og við eigum þetta algerlega skilið. Við töpuðum bara einum leik og vorum að jafna stigametið í sumar, þetta er búið að vera æðislegt sumar og við eigum þetta svo sannarlega skilið.“
Viðtalið við Önnu Björk má sjá í heild sinni í myndbandinu hér að ofan.
