Efnilegasti leikmaður 1. deildar karla
,,Þetta er eitt af því sem maður stefndi að, að vekja athygli í þessari deild. Það er gott að vita að það er eitthvað efni í manni," sagði Jón Daði Böðvarsson við Fótbolta.net í gær eftir að hann var útnefndur efnilegasti leikmaður fyrstu deildar karla.
,,Ég er þannig leikmaður að ég er aldrei nógu sáttur. Ég er ágætlega sáttur með sumarið en ég hefði persónulega viljað meira. Það sýnir kannski hvað maður er gráðugur í þessu."
Jón Daði var í lykihlutverki þegar Selfyssingar tryggðu sér sæti í Pepsi-deildinni næsta sumar en hann býst við að leika áfram með liðinu.
,,Það eru allar líkur á því að ég verði áfram. Ég er ekki búinn að heyra neitt og mér líður mjög vel í þessum klúbbi. Það er ótrúlegt starf í gangi og ráðning Auðuns (Helgasonar) og Loga (Ólafssonar) var mjög góð. Þeir komu klúbbnum á flot eftir að við féllum."
Selfyssingar féllu úr Pepsi-deildinni fyrir ári síðan en Jón Daði telur að liðið sé betur í stakk búið til að standa sig vel núna.
,,Við erum með mjög góðan mannskap núna og töluvert sterkari en í fyrra. Ég hef góða trú á að við munum standa okkur vel í Pepsi-deildinni. Ef við leggjum hart að okkur á undirbúningstímabilinu þá hefur maður ekki áhyggjur."
Hér að ofan má sjá viðtalið í heild sinni.
