Magnús Már Einarsson skrifar frá Englandi
Grétar Rafn Steinsson býst við að yfirgefa herbúðir Bolton Wanderers þegar samningur hans við félagið rennur út í sumar.
,,Ég efast um að ég verði áfram. Það er skrýtið fyrir leikmann að spila á fullu og vera mikilvægur hlekkur í liði og vera ,,needed but not wanted", sagði Grétar við Fótbolta.net eftir leik Bolton og Chelsea í fyrradag.
,,Liðið á í miklum fjárhagsörðuleikum og það eru ellefu leikmenn að renna út af samning. Við höfum verið að fá til okkar leikmenn sem eru í lægri launaklassa en þeir sem leikmenn sem við höfum verið að missa."
,,Þetta launa "fair play" sem kemur inn á næsta ári er að valda erfiðleikum hjá mörgum liðum. Ég held að það verði við ramman reip að draga ef Bolton fellur í ár, þá held ég að þetta verði mjög erfitt fjárhagslega fyrir klúbbinn í framtíðinni."
Grétar Rafn var úti í kuldanum hjá Owen Coyle stjóra Bolton framan af þessu tímabili. Coyle notaði marga aðra leikmenn í stöðu hægri bakvarðar og Grétar var langt frá því að vera inni í myndinni.
,,Ég var mjög fúll að sitja á bekknum og vera úti þegar ég átti ekki skilið að vera úti. Á tímabili fannst mér vera reynt að setja alla í hægri bakvarðarstöðuna og þrátt fyrir að leikmenn væru reknir út af var ég ennþá á bekknum."
,,Maður dettur í smá þunglyndi en aðalatriðið er að sýna sig og sanna að maður eigi að vera þarna. Vonandi fæ ég einhvern klúbb til að taka við mér þegar tímabilið er búið en þangað til vil ég hjálpa Bolton. Ég hef sterkar taugar til Bolton, ég hef spilað þar í dágóðan tíma og ég vil enda á góðum nótum."
Grétar kom aftur inn í lið Bolton í desember en þurfti hann að slíðra sverðin við Owen Coyle fyrst?
,,Ég hef ekkert um það að segja, no comment. Ég er of hreinskilinn," sagði Grétar brosandi.
Hér að ofan má sjá viðtalið í heild sinni.
Athugasemdir
