,,Það er löngu kominn tími á sigur og menn eru vel stemmdir. Eftir að hafa farið á EM eru svolítil vonbrigði að berjast neðst í riðlinum núna en við þurfum bara að standa okkur úr því sem komið er," segir Hólmar Örn Eyjólfsson fyrirliði U21 árs landsliðs Íslands en liðið mætir Aserbaídsjan í undankeppni EM á KR-velli klukkan 19:15 í kvöld.
Íslenska liðið er fyrir leikinn með þrjú stig eftir fimm leiki á botni riðilsins, stigi á eftir Aserum sem unnu fyrri leik liðanna 1-0 í febrúar síðastliðnum.
,,Útileikurinn var frekar skrýtinn, við vorum betri aðilinn og klaufar að klára þetta ekki sjálfir. Þeir skoruðu úr aukaspyrnu utan af velli og það var leiðinlegt að tapa þeim leik þannig að við eigum harma að hefna."
Hólmar Örn er sjálfur kominn í fínt stand eftir að hafa verið meiddur lengi vel í vetur. Hólmar spilaði mikið hjá Bochum undir lok tímabilsins og er klár í slaginn í kvöld.
,,Ég spilaði síðustu 12-14 leikina og er loksins farinn að spila að viti. Maður getur gert tilkall í A-landsliðið og það er bara jákvætt," sagði Hólmar sem lék sinn fyrsta A-landsleik í síðustu viku.
,,Það var mjög skemmtilegt og vonandi getur maður gert meira af þessu. Það er þvílíkur heiður að spila fyrir Ísland. Það eru góðir strákar að koma upp og gott lið og það væri frábært að fá að vera partur af því."
Eyjólfur Sverrisson, faðir Hólmars og þjálfari U21 árs landsliðsins, lék á sínum tíma 66 landsleiki og Hólmar segir gaman að feta í fótspor hans og spila með A-landsliðinu.
,,Þegar maður var að horfa á þetta sem pínulítill gutti þá öfundaði maður hann alltaf á vellinum. Hann var hrikalega hress með þetta, svo lengi sem ég bæti ekki leikjametið hans er honum sama," sagði Hólmar léttur í bragði að lokum.
Athugasemdir
