„Mér fannst þetta bara vera lélegur leikur hjá okkur. Við vorum aldrei í takt við leikinn, sérstaklega í fyrri hálfleik en í seinni hálfleik fannst mér við hægt og bítandi komast í takt við þetta,“ sagði Þórður Þórðarsson, þjálfari ÍA, eftir 1-1 jafntefli við Val á Akranesi í kvöld. Þórður var ekki ánægður með spilamennsku sinna manna og sagði leikinn einfaldlega hafa verið lélegan.
„Það var fínt að fá stigið. Maður var farinn að örvænta eftir að við fengum þetta mark á okkur að þetta færi illa en við sættum okkur við stigið úr því sem komið var. Þetta var lélegur leikur hjá okkur og að fá stig út úr lélegum leik er alveg ásættanlegt,“ sagði Þórður.
Bæði mörk leiksins komu á lokamínútunum og aðspurður um þau svaraði Þórður:
„Guðjón Sveinsson, bakvörðurinn okkar, gerir náttúrulega hræðileg mistök sem leikmaður með 500 leiki á ekki að gera og eiga ekki að sjást. Það voru skelfileg mistök en seinna markið er náttúrulega virkilega vel afgreitt hjá Garðari,“ sagði Þórður og hélt síðan áfram að ræða um framhaldið hjá Skagaliðinu sem á ágæta möguleika á að ná í 2. sæti Pepsi-deildarinnar.
Hægt er að horfa á allt viðtalið við Þórð í sjónvarpinu hér að ofan.
Athugasemdir
