Stefán Jóhann Eggertsson hægri bakvörður HK fór mikinn í leiknum og hér er hann í baráttunni við Gunnar Kristjánsson kantmann Víkinga.
Haukur Úlfarsson á hér skot að marki HK með tvo leikmenn Kópavogsliðsins í kringum sig.
Bjarni Þórður bjargaði tvisvar meistaralega í annars daufum leik.
Nýliðar HK unnu sér inn sitt fyrsta stig í úrvalsdeildinni frá upphafi þegar þeir gerðu markalaust jafntefli við Víking í Víkinni í kvöld. Spennustigið var hátt í leiknum enda liðin að spila sem hafa verið spáð 9. og 10. sæti til skiptis fyrir mótið. Í bæði lið vantaði sterka leikmenn og hjá HK fékk hinn 17 ára Hólmar Örn Eyjólfsson sæti í byrjunarliðinu.
HK menn byrjuðu mun betur og pressuðu heimamenn stíft í upphafi leiks. Þeir áttu svo fyrsta færið þegar Bjarni Þórður Halldórsson þurfti að vera snöggur til að verja skot úr teignum frá HK. Í aðdragandanum að því vildu HK menn fá vítaspyrnu dæmda á Sinisa Kekic.
HK áttu svo aftur dauðafæri og var þar að verka Svisslendingurinn Oliver Jaeger. Hann gerði vel í að kasta sér fram á fyrirgjöf frá vinstri en bylmingsfastur skalli hans fór í slánna og út þar sem Þórður Birgisson gerði tilraun til bakfallsspyrnu sem fór langt framhjá.
Það verður að segjast að ekki mikið gerðist í leiknum. Garðar Örn Hinriksson mjög góður dómari leiksins þurfti að blása í flautu sína ótt og títt vegna smávægilegra og óþarfa brota út um allan völl og endaði brotafjöldi á liðin á fjórða tug.
Víkingarnir sóttu aðeins í sig veðrið undir lokin og gerðu tilraun til að hirða öll þrjú stigin. Björn Viðar Ásbjörnsson varð næstum hetja í tvígang á síðustu 5 mínútum leiksins. Í fyrra skiptið fékk hann dauðafæri á markteig en var of lengi að fóta sig og skot hans varið af Gunnleifi Gunnleifssyni í marki HK. Björn átti svo skot rétt framhjá markinu í uppbótartíma.
Það voru svo HK sem stálu næstum sigrinum í lokin þegar Bjarni Þórður varði skalla Ólafs Júlíussonar af stuttu færi eftir hornspyrnu og náðu Víkingar að hreinsa knöttinn svo frá.
Fyrstu stig HK í úrvalsdeild því staðreynd og geta bæði lið sæst á stigin í leik sem bauð ekki upp á mikinn fótbolta á hrikalega lélegum vellinum í Víkinni sem hefur greinilega komið illa undan vetri.
Víkingur (4-5-1): Bjarni Þórður Halldórsson (M), Jón Guðbrandsson, Grétar Sigfinnur Sigurðarson, Valur Adolf Úlfarsson, Hermann Albertsson (Þorvaldur Sveinn Sveinsson 72), Haukur Úlfarsson (Arnar Jónsson 83), Jón Björgin Hermansson, Stefán Kári Sveinbjörnsson, Sinisa Kekic, Gunnar Kristjánsson (Björn Viðar Ásbjörnsson 75), Egill Atlason.
Ónotaðir varamenn: Magnús Þór Magnússon (M), Halldór Smári Sigurðsson, Kristján Vilhjálmsson, Arnar Þórarinsson.
HK (4-5-1): Gunnleifur Vignir Gunnleifsson (M), Stefán Jóhann Eggertsson, Ásgrímur Albertsson, Hólmar Örn Eyjólfsson, Davíð Magnússon, Rúnar Páll Sigmundsson, Finnur Ólafsson (Almir Cosic 75), Jón Þorgrímur Stefánsson, Þórður Birgisson, Kristján Ari Halldórsson (Calum Þór Bett 64), Oliver Jaeger (Ólafur Valdimar Júlíusson 90).
Ónotaðir varamenn: Stefán Tandi Halldórsson (M), Eyþór Guðnason, Hafsteinn Briem, Aaron Palomares.
Tölfræði
Skot: Víkingur 8 (4 á markið), HK 11 (6 á markið)
Horn: Víkingur 5, HK 6
Rangstaða: Víkingur 5, HK 1
Brot: Víkingur 17, HK 22
Maður Leiksins: Bjarni Þórður Halldórsson (Víkingur)
Dómari: Garðar Örn Hinriksson. Mjög góður.
Aðstæður: Frábært veður en völlurinn lélegur.
Áhorfendur: 1630
Athugasemdir
