Gangur vítaspyrnukeppninnar:
1-2 Casper Jacobsen skorar
Casper Jacobsen ver frá Herði Magnússyni
1-3 Guðmann Þórisson skorar
2-3 Hólmar Örn Eyjólfsson skorar
2-4 Jóhann Berg Guðmundsson skorar
3-4 Goran Brajkovic skorar
3-5 Arnór Sveinn Aðalsteinsson skorar
4-5 Finnur Ólafsson skorar
4-6 Olgeir Sigurgeirsson skorar

Breiðablik er komið í undanúrslit Lengjubikars karla eftir sigur á grönnum sínu HK eftir æsispennandi leik þar sem úrslitin réðust í vítaspyrnukeppni. Áhorfendur fjölmenntu á leikinn í Kórnum í kvöld og létu ágætlega í sér heyra.

HK-ingar komust yfir um miðbik fyrri hálfleiks. Hermann Geir Þórsson skoraði þá eftir fyrirgjöf frá hægri. Blikar mótmæltu markinu og töldu að um rangstöðu hafi verið að ræða en markið stóð og HK-ingar komnir yfir,

Rétt fyrir leikhlé ætlaði alltaf að sjóða upp úr og ryskingar voru á milli leikmanna en Blikar sökuðu Almir Cosic leikmann HK um að hafa verið með kynþáttafordóma gagnvart Prince Rajcomar. Skömmu síðar flautaði Einar Örn Daníelsson dómari til leikhlés en mikill hiti var í leikmönnum þegar að þeir gengu til búningsherbergja.

Bæði lið áttu ágætis tilraunir í síðari hálfleik og markverðirnir, Gunnleifur Gunnleifsson hjá HK og Casper Jacobsen hjá Blikum, áttu nokkrar ágætis markvörslur.

Þegar um korter var eftir jafnaði Arnar Grétarsson fyrirliði Blika en hann skoraði með fallegu skoti úr aukaspyrnu af 25 metra færi.

Undir lok leiks varði Casper vel frá varamanninum Eyþóri Helga Birgissyni sem var í ágætu færi en fleiri urðu mörkin ekki í venjulegum leiktíma og því varð að grípa til framlengingar.

Í framlengingunni fékk varamaðurinn Steinþór Freyr Þorsteinsson fínt færi fyrir Blika en skot hans fór yfir. Hörður Magnússon fékk síðan ágætis færi hinu megin á vellinum en skot hans fór yfir.

Í síðari hálfleik var framlengingar fékk Steinþór aftur frábært færi en í tvígang tókst honum ekki að skora. Á lokamínútu framlengingarinnar átti Eyþór Helgi síðan fyrirgjöf og minnstu munaði að HK-ingur næði að reka tána í boltann. Ekkert var hins vegar skorað í framlengingunni og því var farið í vítaspyrnukeppni.

Í vítaspyrnukeppninni varði Casper Jacobsen markvörður Blika eina spyrnu og skoraði auk þess sjálfur úr einni. Blikar nýttu allar fimm spyrnur sínar og tryggðu sér þannig sigurinn þegar að Olgeir Sigurgeirsson skoraði úr fimmtu og síðustu spyrnu liðsins.

Blikar mæta sigurvegaranum úr viðureign Fram og FH í undanúrslitum. Fram og FH mætast á morgun en undanúrslit fara síðan fram næstkomandi fimmtudag, sumardaginn fyrsta.