Heimild: Heimasíða KSÍ
Guðmundur Reynir Gunnarsson skoraði tvívegis í dag.
Íslenska U19 karlalandsliðið byrjaði frábærlega í milliriðli fyrir EM 2008 en riðillinn er leikinn í Noregi. Fyrsti leikurinn fór fram í dag og voru Norðmenn mótherjarnir að þessu sinni. Íslenska liðið gerði sér lítið fyrir og lagði heimamenn með þremur mörkum gegn tveimur. Staðan í hálfleik var 2-1 Íslendingum í vil.
Þetta er frábær byrjun hjá íslensku strákunum en heimamenn þóttu, fyrir keppnina, sigurstranglegir í riðlinum en efsta þjóðin tryggir sér sæti í úrslitakeppninni sem fer fram í júlí. Gylfi Þór Sigurðsson kom Íslendingum yfir á 24. mínútu en Norðmenn jöfnuðu á 43. mínútu. Guðmundur Reynir Gunnarsson kom Íslendingum yfir aðeins mínútu síðar og staðan þannig er flautað var til hálfleiks.
Í seinni hálfleik bætti hvort liðið við einu marki og var Guðmundur Reynir aftur á ferðinni fyrir Íslendinga. Kom hann Íslendingum í 3-1 á 64. mínútu en Norðmenn minnkuðu muninn á 69. mínútu. Baráttan var svo mikil síðustu 20 mínúturnar og íslensku strákarnir fögnuðu fræknum sigri vel í leikslok.
Þeir verða aftur á ferðinni á þriðjudaginn þegar leikið verður gegn Ísrael. Í hinum leik dagsins í riðlinum léku Búlgaría og Ísrael og sigruðu Búlgarar með einu marki gegn engu.
Byrjunarliðið (4-5-1): Ögmundur Kristinsson, Eggert Rafn Einarsson, Jósef Kristinn Jósefsson, Fannar Arnarsson, Hólmar Örn Eyjólfsson, Aron Einar Gunnarsson, Guðmundur Kristjánsson, Gylfi Þór Sigurðsson, Rafn Haraldsson, Guðmundur Reynir Gunnarsson, Björn Jónsson
Af heimasíðu KSÍ.
Athugasemdir
