Fótbolta.net hefur borist yfirlýsing frá Guðna Bergssyni í kjölfar undirskriftarlista sem honum var afhentur um miðjan júlí. Yfirlýsing Guðna er hér að neðan en eftir helgi mun Fótbolti.net birta ítarlegt viðtal við Guðna sem enginn verður svikinn af að lesa.
Mig grunaði ekki að stuðningurinn á bakvið mig væri svona mikill og ég verð að viðurkenna að maður hálfpartinn komst við og fékk bakþanka með þessa ákvörðun manns að hætta þegar maður var búinn að lesa undirskrifarlistann og ég vil auðvitað nota tækifærið og þakka öllum þessum sem höfðu fyrir því að senda mér skilaboð.
Þau voru óheyrilega mörg, yfir tvöþúsund. Mér þótti mjög gaman af að lesa þau. Þau voru mörg hver mjög smellin og mér fannst mjög vænt um þessar kveðjur.
Mér þykir auðvitað pínulítið leitt að hafa ekki getað orðið við þessum óskum alls þessa fólks en ég varð því miður á endanum að taka ákvörðum sem mér þótti rétt fyrir sjálfan mig og ég vona að fólk skilji þá ákvörðun og sætti sig við hana.
Ég hefði nú gjarnan viljað verða við þessum óskum en ég fann það bara sjálfur líkamlega og andlega að þetta var góður tími fyrir mig að hætta og maður getur ekki endalaust gengið á líkamann og ég fann líka andlega að ég var búinn að eiga mjög erfitt tímabil í nánast heilt ár, búinn að vera á fullri ferð, og ég hefði eiginlega ekki getað bætt við öðrum þremur fjórum mánuðum á fullu. Ég var bara ekki tilbúinn til þess.
Ég vil bara nota tækifærið að koma þessum þökkum á framfæri fyrir öll þessi skilaboð. Ég hef lesið þau hvert eitt og einasta og hefur þótt þessi stuðningur hreint ótrúlegur og mun alltaf minnast og meta hann.
Ég heyrði fyrst af þessu úti, ég var í fríi á Mallorca og Bergur sonur minn og félagi hans voru að fara inn á tölvuna þarna úti og kíkja á þetta. Þá heyrði ég af þessu og heyrði af öðrum svona umræðum, áskorunum og auglýsingum meira að segja, í þá veru. Ég átti eiginlega bágt með að trúa þessu en svo þegar ég kíkti á þetta seinna meir hafði ég auðvitað mjög gaman að þessu. Ég að vísu las þetta ekki eiginlega fyrr en eftir að ákvörðunin hafði verið tekin sem var kannski eins gott þvi þá hefði ég verið í algjörri klemmu.
Skilaboðin eru svo mörg og það er erfitt að telja upp þau bestu. Það eru mörg hver mjög ljúf og hjartnæm. En það voru þarna ein skilboð frá Birni Orra Hermannssyni sem er sonur vina minna, Eiríku og Hermanns, þar sem hann hvetur mig til að halda áfram og kallar mig svo elsku sykurpúða eftir þeim þarna í 70 mínútum. Þau voru svolítið skondin, þau skilaboð, en svo voru margar vísurnar sem voru frábærar.
Þetta voru mörg hver mjög skemmtileg og húmorísk skilaboð og einlæg og bara frábær.
Guðni Bergsson, ágúst 2003
Athugasemdir
