Jóhann Kristinn Gunnarsson
Jóhann Kristinn Gunnarsson þjálfari Þór/KA var að vonum léttur í lund er hann mætti til viðtals við fréttaritara Fótbolta.net eftir 1-0 sigur norðankvenna á liði Keflavíkur í Keflavík fyrr í kvöld. Sigur sem fleytti liðinu í þriðja sæti deildarinnar og gerði aksturinn heim til Akureyrar eflaust skemmtilegri en ella.
Lestu um leikinn: Keflavík 0 - 1 Þór/KA
„Þetta voru risastór þrjú stig ef hægt er að segja svo. Þetta er svakalega erfiður útivöllur, öflugt lið sem hefur verið að ná í úrslit gegn sterkum liðum þannig að við erum ótrúlega ánægð og þessi hemferð verður mikið betri og mikið skemmtilegri.“+
Upplegg Þórs/KA var skynsamt í vindinum í Keflavík í kvöld þar sem liðið lá til baka og sótti hratt þegar færi gafst. Sá Jóhann veikleika í liði Keflavíkur með þessu uppleggi?
„Það er ekkert rosalega mikið af veikleikum í þessu liðið Keflavíkur. Þetta er þrælvel skipulagt lið og það er erfitt að brjóta þær á bak aftur en það voru svæði í þessum leik. Þær vilja sækja og við erum á útivelli sem við höfum þegar tapað á í bikarkeppninni fyrr í sumar. Þannig að já við ætluðum að vera svolítið þéttar fyrir og þá sérstaklega á móti vindinum.“
Sigurinn var kærkominn fyrir Jóhann og lið Þórs/KA en tvívegis í sumar hefur liðið þurft að lúta í gras gegn Keflavík.
„Við erum búin að tapa tvisvar sinnum fyrir þeim í sumar mjög verðskuldað. Þannig að við erum gríðarlega ánægð með að hafa komið til baka og náð í þrjú stig hérna á útivelli.“
Sagði Jóhann en allt viðtalið við hann má sjá í spilaranum hér að ofan.
Athugasemdir
