Hummels kemur til félagsins á frjálsri sölu eftir að hafa yfirgefið Borussia Dortmund í sumar.

Miðvörðurinn er 35 ára gamall og er með bestu varnarmönnum heims síðasta áratuginn.

Á síðasta tímabili minnti hann áhugamenn um fótbolta um að gæði eru varanleg. Hann var einn af bestu mönnum Dortmund er liðið komst í úrslitaleik Meistaradeildar Evrópu og var valinn í lið ársins í keppninni.

Samningur Þjóðverjans hjá Dortmund rann út eftir síðasta tímabil og ákvað hann í fyrsta sinn á ferli sínum að yfirgefa Þýskaland og skoða tilboð frá öðrum löndum.

Hann hefur nú samið við AS Roma á Ítalíu og er samningurinn út tímabilið, en þetta staðfesti félagið á samfélagsmiðlum í kvöld.

Hummels var hluti af þýska landsliðinu sem vann HM árið 2014 og þá vann hann tólf titla með Bayern og Dortmund ásamt því að vinna EM með U21 árs landsliðinu árið 2009.