2. deild: Njarðvík tapaði annan leikinn í röð - Sigurmark í blálokin

Reynir Sandgerði vann óvæntan, 1-0, sigur á Njarðvík í 2. deild karla í kvöld en sigurmark leiksins kom í blálokin. Þetta er annað tap Njarðvíkur í röð.

Njarðvík tapaði fyrir Víkingi Ólafsvík í síðustu umferð, 3-1, en það var fyrsta tap liðsins í deildinni í sumar.

Liðið beið svo lægri hlut fyrir Reyni í kvöld en Akil Rondel Dexter De Freitas gerði sigurmarkið undir lok leiks.

Reynismenn hafa verið við botninn í allt sumar en þessi sigur er gríðarlega mikilvægur fyrir liðið sem er í 11. sæti með 10 stig á meðan Njarðvík er áfram á toppnum með 37 stig, átta stigum á undan Þrótti sem er í öðru sætinu og á leik til góða.