Sigurður Bjartur Hallsson, framherji FH, fór á kostum í 4-4 jafntefli gegn Val á N1-vellinum í kvöld. Hann skoraði þrennu og átti vörn Vals í stökustu vandræðum með hann í kvöld.
„Þetta var bara orðin hálfgerð þvæla þarna í fyrri hálfleik. Ég hélt að við værum að fara að ganga frá þeim fyrsta korterið. Við vorum töluvert sterkari aðilinn og fókusleysi hjá okkur í fyrstu þremur mörkunum. Mér fannst við vera sterkari úti á velli og líklegastir til þess að skora fannst mér yfirleitt. Það er bara skellur að missa þetta í 3-2 fyrir hálfleik," sagði Sigurður Bjartur Hallsson, leikmaður FH.
Lestu um leikinn: Valur 4 - 4 FH
FH-ingar höfðu ekki miklu að keppa í kvöld en þeir sitja í 5. sæti og keppast auðvitað við að halda því en annars hafa þeir engu að keppa og má því kannski segja að þeir hafi sleppt fram af sér beislinu í kvöld.
„Það er alltaf verið að spila upp á stoltið og við tökum þessa leiki með okkur inn í næsta tímabil og við sáum það bara á seinasta tímabili, að þá enduðum við, eins og aumingjar, og komum inn í mótið, eins og aumingjar. Það skiptir máli hvernig þú endar."
Sigurður Bjartur Hallsson er þá kominn með 13 mörk á leiktíðinni og gerði hann þrennu í þessum leik. Hann hefur því farið með himinskautum þetta tímabil.
„Þetta var ábyggilega útaf leiknum í fyrra, þegar við gerðum 2-2 jafntefli hérna og þá sungu Valsarar æfa meira, æfa meira endalaust, þegar ég klúðraði hverju dauðafærinu á fætur öðru, þannig að ég er bara búinn að æfa mig meira heima," sagði framherjinn að lokum.
