Víkingur R. hefur tilkynnt að svo gott sem allir miðar fyrir seinni leik liðsins gegn Malmö í undankeppni Meistaradeildarinnar hafi selst upp.
Íslands- og bikarmeistarar Víkings töpuðu 3-2 á útivelli þrátt fyrir að leika manni færri í tæpa klukkustund. Það eru því góðir möguleikar á sögulegum sigri íslensks félagsliðs gegn stórliði frá Skandinavíu.
Víkingur er að berjast um sæti í riðlakeppni Meistaradeildar Evrópu en engu íslensku félagsliði hefur tekist að spila í riðlakeppni mótsins. Þó Víkingum takist að fara með óvæntan sigur af hólmi hér gegn Malmö er leiðin í riðlakeppnina enn löng og ströng.
„Við bendum fólki þó á að fylgjast vel með hér á samfélagsmiðlum Víkings þar sem það gætu bæst við nokkrir auka miða í sölu seinna í vikunni," segir meðal annars í færslu Víkings á Facebook.
Þess má geta að Kristall Máni Ingason er í leikbanni eftir að hafa fengið tvö gul spjöld í fyrri leiknum. Fyrra gula spjaldið fékk hann fyrir leikaraskap eftir að hafa verið sparkaður niður og það seinna fyrir að fagna marki með að sussa á áhorfendur Malmö.