Ísland þarf að vinna leikinn til að komast í úrslitin og á þar möguleika á að tryggja sér sæti í lokakeppni EM þar sem við spiluðum árið 2016.

Katrín Jakobsdóttir, forsetisráðherra, býst við að leikurinn fari fram en að hann verði leikinn án áhorfenda vegna þeirra 99 smita sem greindust í gær.

„Þetta mun hafa áhrif á leikhús og íþróttastörf, ég vænti þess að leikurinn geti farið fram en að við þurfum að horfa á hann í sjónvarpinu," sagði Katrín í kvöldfréttum Stöðvar 2.

Þegar þetta er skrifað eru alls 747 virk smit hér heima og er Íslandsmótið í knattspyrnu til að mynda í hættu.

Það verður blóðtaka fyrir íslenska liðið að spila án áhorfenda í viðureigninni en Rúmenía er með ansi sterkt lið og verður verkefnið ekki auðvelt.

Vonast var til að 900 stuðningsmenn gætu mætt á völlinn á fimmtudag en útlit er fyrir að það verði ekki raunin.