Davíð Snorri Jónasson.
U21 landsliðið er að búa sig undir mikilvægan leik gegn Hvíta-Rússlandi á morgun í undankeppni EM. Ísland á möguleika á því að komast í umspil en þarf að treysta á að Grikkland misstígi sig á lokasprettinum.
Sjá einnig:
Þetta þarf að gerast svo U21 komist í umspil
Sjá einnig:
Þetta þarf að gerast svo U21 komist í umspil
„Möguleikinn er enn opinn en Grikkirnir eru enn með stjórnina á þessu," sagði Davíð Snorri Jónasson, þjálfari U21 landsliðsins, fyrir æfingu í morgun.
„Við settum þennan glugga þannig upp að við ætluðum að fara í hann með góða tilfinningu og eiga góða leiki. Leikurinn á morgun er skref í því. Halda áfram að spila vel og vonandi fylgja úrslitin með í því."
„Markmiðið okkar var að vera í séns þegar júníglugginn myndi byrja. Þannig er staðan og við reynum að bæta okkur áfram og njóta stöðunnar. Það er ýmislegt undir og það er bara gott."
Ísland vann 2-1 útisigur í fyrri leiknum gegn Hvíta-Rússlandi. Hvernig lið er þetta?
„Þetta eru líkamlega sterkir strákar. Þeir eru tilbúnir að fara í slagsmál og eru beinskeyttir sóknarlega. Við þurfum að vera klárir í að taka aðeins á þeim. Þetta verður hörkuleikur og þeir hafa spilað vel upp á síðkastið."
Davíð hvetur fólk til að mæta á leikinn á morgun sem verður klukkan 18:00 á Víkingsvelli.
