„Ég er ekki alveg hundrað prósent sáttur við leikinn í heild sinni en auðvitað sáttur með eitt stig eftir því sem á gékk og við erum ennþá taplausir heima þannig við sættum okkur við það en maður hefði viljað meira frá liðinu í dag." sagði Jón Þórir Sveinsson þjálfari Fram eftir 3-3 jafnteflið gegn Víking Reykjavík í Úlfarsárdal í kvöld.
Fram eru taplausir á þessum nýja velli í Úlfarsárdal og virðast Framarar elska að spila á þessum velli.
„Ég held að leikurinn heilt yfir hafi verið skemmtilegur. Víkingarnir náttúrulega frábærir og mikil orka sem þeir settu í leikinn og hrós á þá fyrir það því þeir eru í mjög erfiðu prógrami og fara í virkilega erfiðan leik og strax út í nótt og bara hrós á þá að hafa náð að fókusera á þennan leik eins og þeir gerðu og voru mjög öflugir lengst af en við á móti skorum mörk og við erum alltaf líklegir til þess en þrjú mörk heima vill maður að dugi til að vinna leiki."
Jöfnunarmarkið umdeilda kom undir lok leiksins eftir hornspyrnu frá Fram inn á teiginn og Ingvar Jónsson virtist vera komin með hendurnar á þann bolta þegar Brynjar Gauti Guðjónsson setti boltann í netið.
„Mér sýndist hann ekki vera með hendurnar á boltanum, boltinn liggur þarna fyrir framan og hann er að skutla sér í hann og Brynjar á móti en það var alltaf brot, en það var alltaf brot í aðdraganda fyrsta markinu hjá Víkingum."
Viðtalið í heild sinni má sjá í sjónvarpinu hér að ofan.
