Chante Sandiford, fyrirliði og markvörður Hauka
„Mér fannst fyrri hálfleikur ekki góður hjá okkur. Við vorum ekki að færa boltann nógu hratt og vorum opnar varnarlega. Seinni hálfleikur var töluvert betri en það vantaði uppá síðustu sendinguna,“ sagði Chante Sandiford, markvörður og fyrirliði Hauka, eftir 2-0 tap gegn Víkingum í kvöld.
Lestu um leikinn: Víkingur R. 2 - 0 Haukar
Tapið er mikil vonbrigði fyrir Hauka sem hafa sett stefnuna á að komast upp um deild en eru að dragast aftur úr toppliðum Tindastóls og Keflavíkur. Hvað þurfa Haukar að gera betur til að taka þátt í toppbaráttunni af meiri alvöru?
„Við þurfum að lesa leikinn betur og bregðast við. Sérstaklega í leik eins og þessum. Við vorum með ákveðna hugmynd um hvernig við ætluðum að spila leikinn en þær lágu vel til baka og biðu eftir okkur. Við héldum áfram að fylgja upphaflegu hugmyndinni jafnvel þó við sæjum að það gengi ekki. Það tók okkur heilan hálfleik að laga það. Þegar við komum þessu í lag gekk betur að skapa en mér finnst við þurfa að átta okkur fyrr á hlutunum og bregðast við,“ sagði Chante um vandræði Hauka og viðurkennir að baráttan um úrvalsdeildarsæti verði vissulega strembnari eftir þessi úrslit.
„Þetta verður þá bara aðeins erfiðara. Við þurftum þessi þrjú stig. Við þurfum öll stig sem eru í boði og megum ekki tapa fleirum. Þetta gæti farið að velta á því að önnur lið tapi stigum. Við þurfum bara að reyna að skilja við þennan leik, halda áfram og reyna að sækja öll þau stig sem við getum.“
Nánar er rætt við fyrirliða Hauka í spilaranum hér að ofan.
Athugasemdir
