Tottenham 0 - 0 Milan (0-1 samanlagt)
Rautt spjald: Cristian Romero, Tottenham ('77)
Tottenham er dottið úr leik í Meistaradeild Evrópu eftir markalaust jafntefli á heimavelli gegn Ítalíumeisturum AC Milan.
Tottenham tapaði útileiknum 1-0 í Mílanó og tókst ekki að skora á heimavelli í kvöld.
Tottenham sýndi slaka frammistöðu gegn Milan í kvöld og skapaði litla sem enga hættu gegn sterkri varnarlínu andstæðinganna, sem hafði öruggan Mike Maignan fyrir aftan sig.
Leikurinn einkenndist af mikilli baráttu og miðjumoði og voru gestirnir hættulegri í sínum aðgerðum.
Það lifnaði við leiknum þegar Cristian Romero fékk seinna gula spjaldið sitt á 77. mínútu en tíu leikmönnum Tottenham tókst ekki að jafna.
Harry Kane komst næst því með skallatilraun í uppbótartíma sem Maignan varði og geystust gestirnir í skyndisókn í kjölfarið. Þar endaði skot Divock Origi í stönginni og Tottenham heppnir að tapa ekki heimaleiknum.
Milan er fjórða félagið til að tryggja sér þátttökurétt í 8-liða úrslitunum eftir Benfica, Chelsea og FC Bayern.