Völsungur tapaði 3-0 gegn Þrótti í 3. umferð Lengjudeildarinnar í dag. Fótbolti.net ræddi við Elfar Árna Aðalsteinsson, bráðabirgðaþjálfara liðsins, eftir leikinn.
Lestu um leikinn: Völsungur 0 - 3 Þróttur R.
„Maður vill nátturulega aldrei tapa á heimavelli sérstaklega. Við gefum þeim eitt mark í forgjöf á fyrstu mínútum, sofandaháttur í föstu leikatriði. Mér finnst við bregðast vel við en svo kemur mark númer tvö og þá finnst mér við fara úr okkar kerfi og erum út um allt og missum leikinn í svolítið rugl," sagði Elfar Árni.
Jochum Magnússon var í markinu hjá Völsungi í dag en hann kom til liðsins frá Víkingi á lokadegi félagaskiptagluggans. Jeffrey Baltus, sem var í markinu í fyrstu tveimur leikjunum, er farinn frá félaginu.
„Hann kom í samfloti með þjálfaranum sem var hérna. Hann vildi ekki vera hér lengur, við viljum ekki hafa einhvern sem vill ekki vera hérna í þessu verkefni og til allrar hamingju fundum við flottan strák í honum Jochum og við erum mjög spenntir að gefa honum tækifæri."
Elfar Árni er spilandi þjálfari liðsins en hann er að berjast við erfið meiðsli.
„Fókusinn er á öðrum stað núna. Maður er að reyna sinna þessu verkefni og þá setur maður sjálfan sig í 2. sæti á meðan. Vonandi get ég farið að einbeita mér af því fljótlega. Ég get ekki sagt af eða á með það, vonandi get ég gert það," sagði Elfar Árni.
