Gunnar Heiðar Þorvaldsson, þjálfari HK, var að vonum svekktur eftir fyrsta tap HK í sumar en liðið tapaði 4-3 gegn Vestra á Ísafirði í dag. Fótbolti.net ræddi við hann eftir leikinn.
„Maður er í þessu til að vinna leiki. Við vorum með mjög góðan undirbúning. Mér fannst við stíga vel á þá, skorum fyrsta markið og fáum góð tækifæri til að ná inn 2-0 markinu. Það hefði breytt leiknum mikið," sagði Gunnar Heiðar.
„Í staðin gerum við barnaleg mistök í þessum tveimur mörkum í fyrri hálfleik. Þá eru þeir komnir með yfirhöndina sem mér fannst ekki sanngjarnt en það er sanngjarnt því við bjóðum upp á það. Það er eitthvað sem við þurfum að laga. Við verðum að gera betur en þetta í meistaraflokki."
HK fær Víking í heimsókn í bikarnum á miðvikudaginn.
„Við höldum áfram að byggja ofan á það sem við erum að gera. Tökum þessa hluti sem við gerðum ekki nægilega vel í dag og bætum fyrir næsta leik. Það er gamla góða bara næsti leikur og það er að fá Íslandsmeistarana heim í Kórinn. Við ætlum að taka vel á móti þeim og taka vel á þeim, gefa þeim alvöru leik. Vonandi verður stúkan full og mikil stemning," sagði Gunnar Heiðar.
