Fótbolti.net ræddi við Sigurvin Ólafsson, þjálfara Þróttar, eftir sigur á Völsungi í dag. Þróttur er á toppi Lengjudeildarinnar með fullt hús stiga eftir þrjár umferðir.
Lestu um leikinn: Völsungur 0 - 3 Þróttur R.
„Það var ljúft að ná forystunni strax, það kom leiknum í þægilega stöðu. Það getur allt gerst og miðað við marga aðra leiki var þetta þægilegt," sagði Venni.
„Ef þú nærð forystu snýst þetta um um að gefa ekki færi á sér og hleypa andstæðingnum inn í leikinn. Það leiðir oft til þess að menn verða rólegri og öruggari. Hins vegar erum við með ótal opnanir og dauðafæri í seinni hálfleik til að endanlega aflífa þennan leik en ég kvarta ekki."
Kári Kristjánsson spilaði allan leikinn en hann kom aftur til liðsins á dögunum eftir stutta dvöl hjá FH.
„Ég er svo fljótur að gleyma, mér finnst eins og hann hafi ekki farið. Hann smellpassar inn í þetta eins og skot, gott og gaman að vera búinn að endurheimta hann."
Venna líður vel á toppnum.
„Það er ómögulegt (að biðja um meira). Nú er verkefnið hvernig við höndlum það og að líða vel á toppnum. Það er kalt á toppnum en við þurfum að hreiðra um okkur þar."
