Willian kveður Chelsea - Skrifaði bréf til stuðningsmanna
Mynd:
Getty Images
Brasilíski leikmaðurinn Willian hefur staðfest það að hann yfirgefi Chelsea í sumar eftir sjö ára dvöl hjá Lundúnarliðinu.
Framtíð Willian hjá Chelsea hefur lengi verið í umræðunni og talið er að Willian vildi vera áfram hjá Chelsea en hann var að leitast eftir þriggja ára samning. Chelsea var ekki tilbúið að bjóða honum það.
Þessi 32 ára gamli leikmaður skrifaði tilfinningaþrungið bréf á Instagram til stuðningsmanna Chelsea þar sem hann staðfestir það að hann sé á förum. Bréfið má sjá neðst í fréttinni.
„Þetta voru sjö mögnuð ár. Þegar ég fékk tilboð frá Chelsea árið 2013 var ég fullviss um að þetta var staður sem ég vildi vera á," sagði brassinn.
„Í dag er ég viss um að þetta var rétt ákvörðun. Svo margar góðar minningar og titlar sem unnust."
„En hér lærði ég mikið á sjálfan mig. Ég varð betri leikmaður og betri persóna," skrifaði Willian á meðal annars.