Ísland lauk leik á EM kvenna í kvöld þegar liðið tapaði gegn Noregi í fjörugum leik. Fótbolti.net ræddi við Guðrúnu Arnardóttir eftir leikinn.
Lestu um leikinn: Noregur 4 - 3 Ísland
„Við ætluðum okkur sigur í dag og það er vonbrigði að hafa ekki náð því og vonbrigði að hafa ekki komist upp úr riðlinum. Það jákvæða sem við getum tekið út úr þessu eru lokamínúturnar þar sem við erum að reyna og náum að setja inn tvö mörk og stressa þær aðeins," sagði Guðrún.
„Mér fannst við byrja vel. Þegar við fáum fyrsta markið á okkur byrjar að slitna aðeins á milli okkar. Mér fannst það sem einkenndi okkur."
Hvað tekur við eftir mótið?
„Við fáum margar að fara í frí og getum hlaðað batteríin. Hlutirnir gerast hratt í fótbolta og maður verður að vera fljótur að kúppla sig í annan gír."
Samningur Guðrúnar við norska liðið Rosengard er runninn út en hún sagði frá því að hún væri búin að finna sér nýtt lið.
„Það kemur líklegast eftir viku eða tvær. Þið fáið að sjá það bráðum. Það er ekki búið að skrifa undir pappírana."
Það var risastór hópur sem fylgdi Guðrúnu á mótið en Guðrún er Vestfirðingur og það mátti sjá Vestrafána í stúkunni í kvöld.
„Það er ógðeslega gaman. Manni þykir vænt um að hafa fólkið sitt í stúkunni og alla Íslendingana. Ég fæ gæsahúð í hvert skipti sem ég geng inn á völlinn þegar ég heyri í öllum Íslendingunum syngja og hvetja okkur áfram í gegnum súrt og sætt. Ég er stolt af því að fá að spila fyrir framan þetta fólk," sagði Guðrún.
Athugasemdir
