Mjólkurbikarinn: Nökkvi Þeyr afgreiddi Ægi í uppbótartíma

KA tók á móti Ægi í áhugaverðum slag í 8-liða úrslitum Mjólkurbikarsins þar sem báðum liðum hefur verið að ganga vel í sumar.

Akureyringar voru ekki að vanmeta gestina úr Þorlákshöfn og mættu til leiks með sterkt byrjunarlið og var staðan markalaus eftir 45 mínútur. KA stjórnaði ferðinni en skapaði sér lítið af færum þar til alveg undir lok hálfleiksins þegar Nökkvi Þeyr Þórisson átti tvær góðar tilraunir - önnur fór í varnarmann og hin í stöngina.

Þegar tók að líða á seinni hálfleikinn virtust Ægismenn vera að komast meira inn í leikinn en þá refsuðu heimamenn með marki. Sveinn Margeir Hauksson skoraði það mark eftir góða sókn, hann gat lítið annað gert en að skora eftir að hafa fengið boltann frá Nökkva Þey.

Ægismenn fengu hálffæri á lokakafla leiksins en þegar var komið í uppbótartíma ákváðu þeir að leggja allt í sóknina til að sækja sér jöfnunarmark. Það fór ekki betur en svo að Nökkvi Þeyr skoraði tvö mörk með stuttu millibili til að gulltryggja sigur KA og þátttöku Akureyringa í undanúrslitum Mjólkurbikarsins.

Flott varnarframmistaða hjá Ægi sem nýtti ekkert hálffæri og missti einbeitingu í uppbótartíma en KA-menn eru einu númeri of stórir.