Lengjudeild kvenna: Víkingur sótti þrjú stig austur

Það var einn leikur á dagskrá í Lengjudeild kvenna í dag en þá áttust við Fjarðabyggð/Höttur/Leiknir og Víkingur R fyrir austan.

Bæði lið eru um miðja deild og geta ekki farið upp. Því var heiðurinn í húfi í dag og að reyna enda sem hæst á töflunni.

Gestirnir að sunnan reyndust sterkari í dag en Christabel Oduro skoraði fyrstu tvö mörkin fyrir Víkinga og var staðan 0-2 í leikhléi.

Katrín Edda Jónsdóttir minnkaði muninn fyrir heimastúlkur strax í byrjun síðari hálfleiks en það var svo Unnbjörg Jóna Ómarsdóttir sem kláraði leikinn fyrir Víkinga með marki eftir hornspyrnu.

Víkingur er í fjórða sæti Lengjudeildarinnar með 32 stig og en Fjarðabyggð/Höttur/Leiknir er í sætinu fyrir neðan með 26 stig.