Sævar Atli Magnússon reimaði á sig markaskóna þegar Lyngby tók á móti Álaborg í dönsku deildinni í dag.
Hann kom sínum mönnum yfir eftir tæplega tíu mínútna leik en staðan hélst óbreytt þangað til flautað var til loka fyrri hálfleiks.
Álaborg komst yfir með tveimur mörkum á þriggja mínútna kafla snemma í seinni hálfleik. Lyngby fékk vítaspyrnu undir lok leiksins, sem Sævar Atli krækti í, og Frederik Gytkjær skoraði af punktinum og tryggði liðinu stig.
Nóel Atli Arnórsson var ekki með Álaborg í dag en hann er að jafna sig af meiðslum.
Álaborg er í 9. sæti með 16 stig eftir 15 umferðir en Lyngby er í 11. sæti með 10 stig.
Atli gulls ígild
Atli Barkarson lagði upp sigurmark Waregem sem fékk RAAL La Louviere í heimsókn í næst efstu deild í Belgíu.
Waregem komst yfir snemma í seinni hálfleik en gestirnir jöfnuðu metin á 87. mínútu en Atli lagði upp sigurmarkið tveimur mínútum síðar. Waregem er í 2. sæti með 23 stig eftir 11 umferðir en RWDM sem er á toppnum og RAAL eru með jafn mörg stig.
Hólmbert Aron Friðjónsson kom inn á sem varamaður þegar Preussen Munster náði í jafntefli gegn Karlsruher í næst efstu deild í Þýskalandi en Preussen Munster jafnaði metin í uppbótatíma. Liðið er í 16. sæti með 11 stig eftir tólf umferðir.
