Davíð Smári, þjálfari Kórdrengja
Davíð Smári Lamude, þjálfari Kórdrengja var brattur eftir 6-0 stórsigur sinna manna á Hamri í Mjólkurbikarnum í Safamýrinni fyrr í kvöld.
Kórdrengir hafa verið duglegir á leikmannamarkaðinum undanfarið og fengið marga öfluga leikmenn í liðið fyrir þetta tímabil. Davíð Smári var spurður hvort að nýju leikmennirnir taki tíma af þeim gömlu en 9 af þeim 16 leikmönnum sem komu við sögu í kvöld, voru að spila sinn fyrsta keppnisleik fyrir Kórdrengi. Davíð var m.a. spurður út í bekkjarsetu Magnúsar Þóris. „Maggi var pínu tæpur fyrir leikinn og við tókum enga sénsa en auðvitað er það bara þannig að það gengur heilt yfir alla, menn sem standa sig þeir þurfa ekki að fara á bekkinn." segir Davíð og bætir við að Kórdrengir eru með stóran og breiðan hóp í sumar og barátta um öll sæti í liðinu verður mikil. „Það verður bara hörku hörku barátta fyrir alla í liðinu alveg sama hvað þeir heita eða hvað þeir hafa gert fyrir tímabilið. Þetta snýst um þetta tímabil."
Aðspurður um markmiðin fyrir sumarið 2020 segir Davíð, „Markmiðið er í raun og veru bara að spila góðan fótbolta og sjá hvert það fleytir okkur. Auðvitað langar okkur að fara upp úr þessu, það er kannski full stórt að ætla sér að fara upp um þrjár deildir á þremur árum en vissulega er leiðinlegt að vera með ef maður ætlar bara að taka þátt. Við auðvitað förum inn í hvern einasta leik til að vinna hann" segir Davíð fullur sjálfstrausts. Viðtalið í heild má sjá í spilaranum hér að ofan.
Athugasemdir
