Óskar Hrafn Þorvaldsson
Óskar og aðstoðarþjálfarinn Halldór Árnason.
Fréttaritari Fótbolta.net mætti á Kópavogsvöll í gær fyrir æfingu Breiðabliks. Tilefnið er Evrópuverkefni liðsins gegn Racing Union frá Lúxemborg. Liðin eru að mætast í fyrstu umferð Sambandsdeildarinnar. Breiðablik vann 3-2 sigur ytra síðasta fimmtudag eftir að hafa lent 0-2 undir. Seinni leikurinn fer fram á Kópavogsvelli á fimmtudag.
Óskar Hrafn Þorvaldsson, þjálfari Breiðabliks, svaraði nokkrum spurningum um einvígið.
Óskar Hrafn Þorvaldsson, þjálfari Breiðabliks, svaraði nokkrum spurningum um einvígið.
Viðtalið í heild má sjá í spilaranum hér að ofan.
„Ég var í raun og veru mjög sáttur með spilamennskuna í leiknum. Mér fannst við stjórna leiknum að stærstum hluta. Við byrjuðum mjög vel og þeir í raun og veru skora með fyrsta skotinu á markið. Síðan tók við kafli þar sem þeir nýttu sér að hafa skorað og voru eilítið meira með botlann heldur en við fram að 2-0."
„Eftir það fannst mér í raun eitt lið á vellinum og mér fannst við vera sterkir. Þetta lúxemborgska lið er gott, það er skipað góðum einstaklingum, eru með mikið af Frökkum sem eru með ágætis feril. Það að hafa klárað þennan leike eftir að hafa lent 2-0 undir er sterkt og gott að sjá að menn missa aldrei trúna, þeir fylgja planinu og eru trúir því sem þeir leggja upp með í byrjun. Það var raunin á fimmtudaginn," sagði Óskar.
Hverju breytir það að þið náið að koma inn sigurmarki í þessum fyrri leik?
„Það að vinna Evrópuleik er stórt, það er alls ekki sjálfgefið, það er gott fyrir móralinn, gott fyrir sjálfstraustið, gott fyrir hópinn, gott fyrir félagið og gott fyrir Ísland. Það er í raun og veru gott að öllu leyti að við höfum náð þessum sigri. Alveg eins og það var gott að FH vann Sligo Rovers og maður hefði bara viljað sjá Stjörnunni vinna Bohemians. Valsmenn eru svo auðvitað í sínu mjög erfiða verkefni, það er mikill sómi af hvernig þeir enduðu þann leik."
„Ég held það sé mikilvægt sérstaklega í ljósi umræðunnar sem hefur verið að íslensk félagslið skrapi botninn á evrópskum fótbolta."
Þið eruð ekkert að fara inn í leikinn og í það að verja þessa eins marks forystu eða hvað?
„Nei, við kunnum það í raun og veru ekki. Við munum reyna að fara út á fullri ferð, taka frumkvæðið. Við erum á heimavelli, velli sem okkur líður vel og það eina sem er í stöðunni er bara að taka leikinn til þeirra, taka frumkvæðið strax og keyra upp hraðann."
„Þeir eru komnir á seinni hlutann á undirbúningstímabilinu sínu og eru kannski ekki komnir í þá leikæfingu sem þeir hefðu viljað. Það er okkar að gefa þeim ekki tækifæri til að ná einhverju frumkvæði, við þurfum að vera með það og það er þannig sem við munum nálgast leikinn," sagði Óskar.
Athugasemdir
