Ítalski sóknarmaðurinn Mario Balotelli hefur ýjað að því að hann sé að snúa aftur í ítalska boltann.
Balotelli er 34 ára gamall og spilaði síðast með Brescia í Seríu A fyrir fjórum árum.
Síðustu ár hefur hann spilað í Sviss og Tyrklandi, en síðast var hann á mála hjá Adana Demirspor.
Eftir síðustu leiktíð yfirgaf hann félagið en hann hefur verið orðaður við Genoa á Ítalíu og gaf hann sterklega í skyn að hann væri á leið aftur heim en þó með mjög áhugaverðum hætti.
Twitch-stjarnan Enerix var með Balotelli, Emiliano Viviano og Radja Nainggolan í streymi sínu. Enerix sagði þar að hann tæki finnska landsliðsmanninn Joel Pohjanpalo fram yfir Balotelli, en Pohjanpalo hefur verið öflugur með Íslendingaliði Venezia síðustu ár.
„Hvað í andskotanum ertu að segja?“ spurði Balotelli, en Enerix tók það sérstaklega fram að góður árangur Balotelli síðustu ár hafi ekki verið í Seríu A og því ekki tekið með inn í dæmið.
„Telur það ekki af því ég var ekki í Seríu A? Þú og Sería A megið fara til fjandans. Ég lofa þér því að ég mun rústa Seríu A þegar ég skrifa undir. Ég mun rústa þessari deild,“ sagði Balotelli í streyminu.
Balotelli á 52 mörk í 141 leik sínum í Seríu A með Inter, Milan og Brescia.
Athugasemdir
